विगत २४ घण्टामा नेपालमा ८१८ जनामा कोरोनाभाइरस सङ्क्रमण पुष्टि, कोरोनाभाइरसका कारण थप तीन जनाको मृत्यु भएको र ८१८ जना सङ्क्रमित भएको स्वास्थ्य तथा जनसङ्ख्या मन्त्रालयले जनाएको छ।
कोरोनाभाइरस वृद्धिसँगै कोभिड-१९ बाट मृत्यु हुनेको सङ्ख्या १४९ पुगेको छ भने सङ्क्रमित व्यक्तिहरूको कुल सङ्ख्या ३१,९३५ पुगेको छ।
मन्त्रालयका प्रवक्ता डा. जागेश्वर गौतमका अनुसार अहिले १३,१५५ जनामा सक्रिय सङ्क्रमण छ।
तीमध्ये ९,२१२ जना संस्थागत आइसोलेशनमा र ३,९४३ जना घरमै आइसोलेशनमा छन्। गम्भीर लक्षण भएका १३७ जना आईसीयूमा र १० जना भेन्टिलेटरमा भएको मन्त्रालयले जनाएको छ।
अहिलेसम्म १८,६३१ जना भाइरसमुक्त भइसकेको मन्त्रालयको तथ्याङ्कले देखाउँछ।
कोरोनाभाइरस
नेपालमा अहिले सबैभन्दा बढी सक्रिय सङ्क्रमित प्रदेश नं २ र वाग्मती प्रदेशमा छन्।
अहिले पुष्टि भएका सङ्क्रमितमध्ये १६६ जना काठमाण्डू उपत्यकाका, १३९ जना पर्साका र ९१ जना सर्लाहीका छन्।
गत भदौ २ गते कोरोनाभाइरस सङ्क्रमितको सङ्ख्यामा १,०१६ अर्थात् अहिलेसम्मकै सर्वाधिक दैनिक वृद्धि भएको थियो।
त्यसैगरी सरकारले भदौ ५ गते ८३८ जनामा सङ्क्रमण भएको र ११ जनाको मृत्यु भएको पुष्टि गरेको थियो।
यसअघि असार ४ गते ६७१, असार १० गते ६२९, असार १९ गते ७४०, साउन २७ गते ६३८ र साउन ३२ गते ६४१ जनामा सङ्क्रमण पुष्टि भएको थियो।
कोभिड-१९ का कारण मृत्यु पुष्टि भएका व्यक्तिहरू पर्सा र सर्लाहीका दुई जना महिला र झापाका एक जना पुरुष हुन्।
उनीहरू क्रमशः ५३, ३३ र ५८ वर्षका भएको मन्त्रालयले जनाएको छ।
अहिलेसम्मको तथ्याङ्कअनुसार नेपालमा ०.४७ प्रतिशत सङ्क्रमितको मृत्यु भएको देखिन्छ।
